פרק קמד

לְדָוִ֨ד | בָּ֘ר֚וּךְ יְהֹוָ֨ה | צוּרִ֗י הַֽמְלַמֵּ֣ד יָדַ֣י לַקְרָ֑ב אֶ֜צְבְּעוֹתַ֗י לַמִּלְחָמָֽה:

חַסְדִּ֥י וּמְצֽוּדָתִי֘ מִשְׂגַּבִּ֪י וּֽמְפַלְטִ֫י לִ֥י מָֽ֖גִנִּי וּב֣וֹ חָסִ֑יתִי הָֽרֹדֵ֖ד עַמִּ֣י תַחְתָּֽי:

יְהֹוָ֗ה מָה־אָ֖דָם וַתֵּֽדָעֵ֑הוּ בֶּן־אֱ֜נ֗וֹשׁ וַֽתְּחַשְּׁבֵֽהוּ:

אָדָם לַהֶ֣בֶל דָּמָ֑ה יָ֜מָ֗יו כְּצֵ֣ל עוֹבֵֽר:

יְהֹוָה הַט־שָׁמֶ֥יךָ וְתֵרֵ֑ד גַּ֖ע בֶּֽהָרִ֣ים וְֽיֶֽעֱשָֽׁנוּ:

בְּרֹ֣ק בָּ֖רָק וּתְפִיצֵ֑ם שְׁלַ֥ח חִ֜צֶּ֗יךָ וּתְהֻמֵּֽם:

שְׁלַ֥ח יָדֶ֗יךָ מִמָּ֫ר֥וֹם פְּצֵ֣נִי וְ֖הַצִּילֵנִי מִמַּ֣יִם רַבִּ֑ים מִ֜יַּ֗ד בְּנֵ֣י נֵכָֽר:

אֲשֶׁ֣ר־פִּיהֶ֥ם דִּבֶּר־שָׁ֑וְא וִֽ֜ימִינָ֗ם יְמִ֣ין שָֽׁקֶר:

אֱֽלֹהִ֗ים שִׁ֣יר חָ֖דָשׁ אָשִׁ֣ירָה לָּ֑ךְ בְּנֵ֥בֶל עָ֜שׂ֗וֹר אֲזַמְּרָה־לָּֽךְ:

הַנּוֹתֵ֥ן תְּשׁוּעָ֗ה לַמְּלָ֫כִ֥ים הַ֖פּוֹצֶה אֶת־דָּוִ֥ד עַבְדּ֗וֹ מֵחֶ֥רֶב רָעָֽה:

פְּצֵ֥נִי וְהַצִּילֵנִי֘ מִיַּ֪ד בְּנֵי־נֵ֫כָ֥ר אֲשֶׁר־פִּיהֶ֥ם דִּבֶּר־שָׁ֑וְא וִֽ֜ימִינָ֗ם יְמִ֣ין שָֽׁקֶר:

אֲשֶׁ֚ר בָּנֵ֨ינוּ | כִּנְטִעִים֘ מְגֻדָּלִ֪ים בִּנְעֽוּרֵ֫יהֶ֥ם בְּ֖נוֹתֵינוּ כְזָֽוִיֹּ֑ת מְ֜חֻטָּב֗וֹת תַּבְנִ֥ית הֵיכָֽל:

מְזָוֵ֥ינוּ מְלֵאִ֗ים מְפִיקִ֥ים מִזַּ֗ן אֶ֫ל זַ֥ן צֹאונֵ֥נוּ מַֽאֲלִיפ֑וֹת מְ֜רֻבָּב֗וֹת בְּחֽוּצוֹתֵֽינוּ:

אַלּוּפֵ֗ינוּ מְסֻבָּ֫לִ֥ים אֵ֣ין פֶּ֖רֶץ וְאֵ֣ין יוֹצֵ֑את וְאֵ֥ין צְ֜וָחָ֗ה בִּרְחֹֽבֹתֵֽינוּ:

אַשְׁרֵ֣י הָ֖עָם שֶׁכָּ֣כָה לּ֑וֹ אַשְׁרֵ֥י הָ֜עָ֗ם שֶֽׁיְהֹוָ֥ה אֱלֹהָֽיו: