פרק יא

לַֽמְנַצֵּ֗חַ לְדָ֫וִ֥ד בַּֽיהֹוָ֨ה | חָסִ֗יתִי אֵ֖יךְ תֹּֽאמְר֣וּ לְנַפְשִׁ֑י נ֜וּ֗דִי הַרְכֶ֥ם צִפּֽוֹר:

כִּ֚י הִנֵּ֪ה הָֽרְשָׁעִ֡ים יִדְרְכ֬וּן קֶ֗שֶׁת כּֽוֹנְנ֣וּ חִצָּ֣ם עַל־יֶ֑תֶר לִיר֥וֹת בְּמוֹ־אֹ֜פֶ֗ל לְיִשְׁרֵי־לֵֽב:

כִּי־הַ֖שָּׁתוֹת יֵהָֽרֵס֑וּן צַ֜דִּ֗יק מַה־פָּעָֽל:

יְהֹ֨וָה | בְּֽהֵ֘יכַ֚ל קָדְשׁ֗וֹ יְהֹוָה֘ בַּשָּׁמַ֪יִם כִּ֫סְא֥וֹ עֵינָ֥יו יֶֽחֱז֑וּ עַפְעַפָּ֥יו יִ֜בְחֲנ֗וּ בְּנֵ֣י אָדָֽם:

יְהֹוָה֘ צַדִּ֪יק יִ֫בְחָ֥ן וְ֖רָשָׁע וְאֹהֵ֣ב חָמָ֑ס שָֽׂנְאָ֥ה נַפְשֽׁוֹ:

יַמְטֵ֥ר עַל־רְשָׁעִ֗ים פַּ֫חִ֥ים אֵ֣שׁ וְ֖גָפְרִית וְר֥וּחַ זִ֜לְעָפ֗וֹת מְנָ֣ת כּוֹסָֽם:

כִּֽי־צַדִּ֣יק יְ֖הֹוָה צְדָק֣וֹת אָהֵ֑ב יָ֜שָׁ֗ר יֶֽחֱז֣וּ פָנֵֽימוֹ: