פרק ג

מִזְמ֥וֹר לְדָוִ֑ד בְּ֜בָרְח֗וֹ מִפְּנֵ֚י | אַבְשָׁל֬וֹם בְּנֽוֹ:

יְהֹוָה מָה־רַבּ֣וּ צָרָ֑י רַ֜בִּ֗ים קָמִ֥ים עָלָֽי:

רַבִּים֘ אֹמְרִ֪ים לְנַ֫פְשִׁ֥י אֵ֚ין יְֽשׁוּעָ֓תָה לּ֥וֹ בֵֽאלֹהִ֣ים סֶֽלָה:

וְאַתָּ֣ה יְ֖הֹוָה מָגֵ֣ן בַּֽעֲדִ֑י כְּ֜בוֹדִ֗י וּמֵרִ֥ים רֹאשִֽׁי:

קוֹלִי אֶל־יְהֹוָ֣ה אֶקְרָ֑א וַיַּֽעֲ֘נֵ֚נִי מֵהַ֖ר קָדְשׁ֣וֹ סֶֽלָה:

אֲנִ֥י שָׁכַ֗בְתִּי וָאִ֫ישָׁ֥נָה הֱקִיצ֑וֹתִי כִּ֖י יְהֹוָ֣ה יִסְמְכֵֽנִי:

לֹֽא־אִ֖ירָא מֵרִֽבְב֥וֹת עָ֑ם אֲשֶׁ֥ר סָ֜בִ֗יב שָׁ֣תוּ עָלָֽי:

ק֘וּמָ֚ה יְהֹוָ֨ה | הֽוֹשִׁ֘יעֵ֚נִי אֱלֹהַ֗י כִּֽי־הִכִּ֣יתָ אֶת־כָּל־אֹֽיְבַ֣י לֶ֑חִי שִׁנֵּ֖י רְשָׁעִ֣ים שִׁבַּֽרְתָּ:

לַֽיהֹוָ֥ה הַיְשׁוּעָ֑ה עַל־עַמְּךָ֖ בִרְכָתֶ֣ךָ סֶּֽלָה: